Maitane Sáenz de Navarrete Maialen irakasleari egindako elkarrizketa

                        IRAKASLE BATI EGINDAKO ELKARRIZKETA

Maialen Kimba haur eskolako irakaslea da, bera 6 hilabete dituzten umeekin dago gaur egun lanean. Irakaslea izateko haur hezkuntzako gradua egin zuen unibertsitatean eta aurten lehen hezkuntzako ikasketak bukatuko ditu. Maialen hiru hizkuntza dakizki: gaztelera, euskara eta ingelesa. Izan ere bere iritziz irakasleek etengabeko formakuntza izan beharra daukate, ikastaroak egitea, artikuluak irakurtzea... ezinbestekoa da.

Lehenik eta behin berarekin izandako elkarrizketan irakasle lana bilatzeko oztopoei buruz hitz egin dugu, baita berak lan egiten duen haur eskolari buruz. Azaldu digu nolako hezkuntza sistema erabiltzen dute haiek. Ondoren berak irakasle moduan izandako ardurak zeintzuk izan diren kontatu digu, baita bere lankideekiko duen harremana. Maialenek kontatu digu zer espero zuen berak irakasle lanbidetik eta nolako ekarpen zoragarriak izan dituen berarekiko. Irakasle guztiak bezala, Maialenek ere oztopoak eta arazoak izan ditu, haiei buruz ere hitz egin du. Jarraitzeko, berak irakaskuntzari buruz duen iritzia eman digu; horretarako, diziplinari buruz, teknologia berriei buruz eta hezkuntzak emandako aurrerapausoei buruz berak daukan ikuspuntua eman digu.

Maialenek lana bilatzeko ez zuen oztoporik izan, duela bost urte ikasketak amaitu zituenean bere curriculum vitae utzi zuen Kimba haur eskolan eta deitu zioten, beraz beti lanean egon da leku berberean. Kimba haur eskola izaera pribatua du eta Glen Domanen ikaskuntza goiztiarraren metodoa jarraitzen du. Zentzumenen estimulazioaren eta mugimendu ariketen bidez lan egiten dute. Bestalde, zentroa hirueleduna da; euskaraz, gazteleraz eta ingeleraz komunikatzeko gaitasunak garatzea du helburu. Azkenik, ume bakoitzari arreta pertsonalizatua ematen zaio,bakoitzaren  heltze erritmoak errespetatuz.

Ikastetxean, Maialenen ardura gela da, hau da, gelako tutorea denez bere taldearen ardura eta koordinazioa dauka. Programaketak, jarduerak, bilerak… prestatzen ditu. Honetaz gain, praktikako tutore moduan ere aritu izan da. Lankideekin harreman estua dauka, lanbide honetan beharrezkoa da lan taldearengan konfiantza edukitzea eta lan kooperatiboa egitea dio Maialenek. Haurren familiekiko erlazioa zaindu behar da, konfiantza izatea ezinbestekoa da. Gurasoek lasai egon behar dira bere umeak zentroan ustean, haiei informazioa ematea oso garrantzitsua da.

Haur eskola honetan, kamera batzuk dituzte eta gurasoei pasahitza batzuk ematen dizkiote interneten bidez bere haurrak egiten duten guztia ikusteko asmoz. Horrela ere gurasoek lehen eskutik dakite bere haurrek eskolan egindakoa, hain garrantzitsuak diren gauzak ume baten heziketan etxean ere landu ahal izateko. Maialenek dio gurasoek konfiantza osoa dutela haur eskolarengan eta oso pozik daudela han erabilitako sistemarekin.

Bestalde, Irakasle lanbidea berak espero zuen baino bikainagoa iruditu zaio. Haurrak heztea eta hazten ikustea liluragarria da. Maialenen esanetan, haur eta familia guztietatik beti zerbait ikasi daiteke. Dakigunez, familia mota ezberdinak daude eta familia bakoitzak modu batean jokatzen du. Ezin dugu orokortu denetarik dagoelako, baina Maialenen ustez, gaur egungo familiek denbora gutxi eskaintzen diete seme-alabei. Gurasoek denbora gehiago egon beharko lirateke haurrekin, kalitatezko momentuak eskainiz eta aldi berean mugak ezarriz.

Maialenek bere bizitzan irakasle moduan aurkitu duen oztoporik handiena familia baten dibortzioa izan zen. Gurasoak dibortziatu ziren eta hasieran oso zaila suertatu zitzaien haurraren heziketa. Gainera haurrak aldaketak nabaritu zituen, bai irakasleek bai familiak elkarrekin lan egin behar izan zuten egoera hori hobetzeko. Arazoa gurasoen eta eskolaren artean zuzendu zen haurraren heziketa hobetuz eta zeuden arazo guztiak konponduz.

Ondoren Maialenen irakaskuntzari buruzko iritzia emango da. Diziplinarekin hasteko, Maialenek uste du beharrezkoa dela. Alde batetik, gure gizartean, eguneroko errutinan arauak aurkitzen ditugu; beraz, haurrei txikiak direnetik arauak betetzearen garrantzia erakutsi behar zaie. Beste aldetik, egiaztatu da bere heziketan mugak dituzten haurren autoestima altuagoa dela mugak ez dituzten haurrenarekin konparatuz. Diziplina eta mugak ez dira autoritarismoarekin nahasi behar.

Honekin jarraituz teknologia berriei buruz ere hitz egin digu Maialenek. Teknologia berriak ikaskuntza prozesuak errazteko baliabide ona dela uste du. Teknologia berriek haurren kuriositatea pizten dute, Maialeni interesgarria iruditzen zaio heziketa klasikoago batekin konbinatzeko. Berak, gelan erabiltzen ditu gehiengoetan soinuak entzuteko eta haurrak soinu horiek asmatzeko, hainbat bideo ikusteko, dantzatzeko…

Dakigunez, hezkuntzak aurrerapauso gutxi batzuk eman ditu urte hauetan, horien artean Maialenen ustez garrantzitsuena heziketa tradizionalaren oztopoen jakitun izatea izan da. Irakaskuntzak aldaketa bat behar du, ikasleak protagonistak izan behar dira, hezkuntzan parte hartu behar dute eta arreta pertsonalizatua merezi dute. Gainera, irakaskuntza benetazkoa izan behar da, manipulazioaren eta esperimentazioaren bidez ikasiz.

Bukatzeko, eskertu beharra daukat Maialenen parte hartzea eta berak nirekin egondako denbora guztia. Berak irakasle moduan nola aritzen den ikusteko aukera izan dut eta gelan egindako lana bikaina da, nire ustez adibide bezala hartu dezakegu.  Beraren laguntzarik gabe ez zen izango posible lan hau gauzatzea.